Florentina Kallaba, referja e parë kosovare në futsal me licencë të UEFA-s dhe FIFA-s

Për Roganën e Dardanën/Kamenicën është privilegj i madh përfaqësimi i Florentina Kallabës në gara kombëtare e ndërkombëtare të futbollit për femra e meshkuj në futsal.

Florentina Kallaba është një sportiste dhe trajnere e suksesshme në Kosovë. E lindur më 18.06.1992 në fshatin Roganë të komunës së Dardanës (Kamenicës), ajo ka mbaruar studimet në nivelin baçëllor në Universitetin e Prishtinës – Fakulteti Ekonomik, dega – Banka, Financa dhe Kontabilitet dhe tani po vazhdon studimet në nivelin master në drejtimin ‘E-qeverisje’.
Florentina gjithashtu është e angazhuar në sport, duke u përfshirë në atletikë, futboll dhe futsal. Ajo ka qenë pjesë e klubit të atletikës K.A Rogana për tetë vjet me radhë, duke marrë pjesë në gara komunale, rajonale dhe kombëtare. Në nivelin komunal dhe rajonal, ajo ka arritur të jetë kampione, ndërsa në nivelin kombëtar është nënkampione e Kosovës në garat e atletikës. Po ashtu, ajo është një ndër themelueset dhe lojtaret e klubit të futbollit për femra KFF ”Intelektualet” – Gjilan.
Florentina ka vijuar trajnimin për trajnerë të futbollit dhe ka fituar licencën UEFA- B Elite Youth, duke qenë femra e parë në Kosovë që e ka fituar këtë lloj licencë. Gjithashtu, ajo ka punuar si trajnere futbolli me grup-moshat 5-9 vjeç në klubin e futbollit “2 Korriku” në Prishtinë dhe është kryetrajnere për femra në Shkollën e futbollit “2 Korriku” – U 17 dhe U 15. Tani, ajo po vijon kursin për licencën A për trajnere të futbollit.
Përveç angazhimeve në klubin e futbollit, Florentina ushtron edhe profesionin e referes në futsal në Kosovë dhe në shtete tjera me stemën e UEFA-s. Me një karrierë të pasionuar në sport dhe synime të mëdha për të arritur sukses, ajo është e vendosur të vazhdojë të kontribuojë në zhvillimin e sportit në Kosovë. Ajo është e gëzuar që është pjesë e kësaj jete sportive dhe falënderon të gjithë ata që e kanë mbështetur në rrugëtimin e saj. Florentina është e vendosur të vazhdojë të punojë fort për të arritur ëndrrat e saj dhe për të bërë ndryshime pozitive në botën e sportit në Kosovë.

1 of 8

Përballja dhe menaxhimi i sfidave në kryerjen e detyrave profesionale

Në fillim të karrierës së saj si referuese në Futsal, ajo u licencua nga UEFA dhe FIFA nga viti 2021. Përgatitja fizike dhe mendore ishin sfidat kryesore për të arritur këtë nivel. Përgatitja mendore ka luajtur një rol të rëndësishëm në përballjen e konkurrencës dhe presionit në fushën e lojës.
Si shqiptare e Kosovës, ajo u përball me pengesa të udhëtimit kur udhëtonte në vende të ndryshme. Mosnjohja e shtetit të Kosovës nga disa vende evropiane shkaktoi vështirësi në udhëtimet për ndeshjet zyrtare. “Në vitin 2022 isha e nominuar që të shkoja në Moldavi, në ndeshje kampionale për femra, por për shkak të mosnjohjes së shtetit tonë nga Moldavët ishte e pamundur, kurse tani në vitin 2024 isha e deleguar nga UEFA që të shkoj në Shangai (KINE) për Kupën e Botës të Universiteteve, por ishte e pamundur të shkoja pasi që kisha procedura për vizë dhe koha ishte a pamjaftueshme”, shprehet Florentina për Inforogana.

Megjithatë, me përkushtim dhe profesionalizëm, ajo arrin t’i tejkalojë shumë sfida të tilla dhe ta përfaqësojë vendin e saj në skenën ndërkombëtare.
Si referuese femër, ajo u përball me sfida të ndryshme, por mbështetja e komunitetit sportiv dhe përkushtimi ndaj profesionalizmit i ndihmuan të përballonte kritikat dhe paragjykimet. Ajo ka treguar autoritet dhe profesionalizëm në fushë, duke fituar respektin e kolegëve dhe lojtarëve.
Edhe pse ka pasur momente kur lojtarët meshkuj kanë shprehur mosmirënjohje ndaj vendimeve të saj si referuese, ajo ka menaxhuar situatat me autoritet dhe profesionalizëm. Pas ndeshjeve, shumica e lojtarëve kanë pranuar vendimet e saj dhe kanë shprehur kërkim falje për sjelljet e tyre.
Pranimi në UEFA për të përfaqësuar vendin e saj në nivel ndërkombëtar është një arritje e madhe për atë. Familja e saj ka qenë një burim i fortë mbështetjeje dhe krenarie për suksesin e saj si referuese në UEFA. Ata kanë qenë të lumtur për arritjet e saj dhe kanë qenë një krah i fortë në rrugën e saj drejt suksesit në fushën e referimit ndërkombëtar./Xhevdet Kallaba/