Adem Gashi – Një jetë e përjetshme nëpërmjet fjalës dhe letërsisë

Me nderim të thellë dhe zemra të rënduara, njoftojmë largimin nga kjo botë të Adem Gashit, një dritë e shquar e gazetarisë, poezisë dhe letërsisë shqipe. Vepra dhe jeta e tij janë dëshmi e një pasioni të pakufishëm dhe një dedikimi të rrallë ndaj artit të fjalës.

Adem Gashi, i cili në vitin 2022 u nderua me Çmimin Kombëtar për Vepër Jetësore «Azem Shkreli», ishte një shtyllë e kulturës dhe letrave shqipe. Artist dhe mendimtar, ai lë pas një trashëgimi të begatë të librave të tij të poezisë dhe prozës, që kanë iluminuar mendjet dhe zemrat e lexuesve në mbarë vendin dhe përtej kufijve.

Si aristokrat i fjalës, të shkruarit e Ademit nuk ishte vetëm një zanat, por një thirrje të cilën e ndiqte me përkushtim e dashuri të padiskutueshme. Poezia dhe proza e tij janë piktura të fjalëve që shprehin ndjenjën e thellë të përjetësisë, të gjallërisë dhe të humanizmit. Frymëzues dhe inovator, Ademi e zgjeroi horizontin e letërsisë sonë dhe na tregoi fuqinë e artit për të ndryshuar dhe për të guxuar.

1 of 6

Kolegë nga Radio Televizioni i Prishtinës dhe nga media të tjera ku ai ka punuar, gjithashtu e njohin Ademin si një mik dhe mentor të patrembur. Ndikimi i tij si gazetar dhe analist letrar ka qenë i pakrahasueshëm, dhe mjeshtëria e tij në të ndërtuar ura ndërmjet informacionit dhe audiencës, një shembull për të gjithë ne që e ndoqëm rrugëtimin e tij profesional.

Sot, Adem Gashi u kthye në dheun që e rriti, në vendin e tij të dashur, fshatin Nekoc të Drenasit, ku u varros pranë të tijve, duke i lënë ata që e donin dhe e admiruan ndër vite me një boshllëk të madh, por edhe me një mirënjohje që do të zgjasë përgjithmonë.

Ndërsa lamtumira jonë është e vështirë, ne e dimë që Adem Gashi do të jetojë përmes fjaleve dhe veprave që ka lënë pas. Në çdo rresht, në çdo varg poezie, në çdo thënie të mençur, zëri i tij do të vazhdojë të flasë dhe të inkurajojë brezat e ardhshëm të shkrimtarëve, poetëve, dhe gazetarëve.

Në përcjelljen e fundit për Ademin, sot, mungoi një akademi përkujtimore në Shoqatë a Lidhje të Shkrimtarëve të Kosovës, sidoqoftë në muret personale-virtuale të Fejsbukut nga miqtë e tij u bë një akademi virtuale me Ademin në qendër.

Në emër timin dhe të miqve të Ademit nga Dardana e Gjilani, që ishim pjesë e varrimit shprehim ngushëllimet tona më të sinqerta për familjen e tij, shokët dhe të gjithë ata që u prekën nga gjenia

liteti i tij. Të gjithë ne që e njohëm personalisht apo përmes artit të tij jemi të pasuruar për të qenë pjesë e jetës dhe kohës së një njeriu kaq të veçantë.

Adem Gashi, lëvizja jote në këtë botë ka qenë e këndshme dhe frymëzuese për gjithë ne që kemi pasur fatin të ndajmë një copëz të rrugës me ty. U prehsh në paqe, i dashur mik dhe kolos i fjalës dhe letërsisë!

Me dhembje të thellë e kujtim të përhershëm: Xhevdet Kallaba, Hysen Këqiku, Sylejman Morina, Nexhat Rexha, Arsim Halili, Ali Berisha, Izet Abdyli etj.

Nekoc, 16 janar 2024